فتاه ضحية زواج بنت العم لولد العم

انا اليوم يايبتلكم قصه واقعيه عن بعض العادات اللي للحين يمارسها البعض مع ان الجيل تغيرر يظلموون عيالهم عشان يحافظون على العايله ومايدرون انهم بهالقرار يحطمونهم ويسبب كره وحقد ....
انا راح اقولكم قصة بنت اسمهاا (نوره) هذي قصة انا سمعتها من البنت نفسها كانت ضحيه زواج بنت العم لولد العم وصارت جسد من غيرر رووح فقدت كل شي بهالحياة صارت تتمنى الموت تقول الله ارحم من عباده
بدت معاناتها بعمر 15 سنه احلى عمر للبنت مع رفيجاتها تعيش عمرها ومراهقاتها
ييوها اهلها وبلغوها خطبتها لولد عمهااا(فهيد) اللي عمره 25 سنه كانت صدمه لها رفضت بس محد سمع لها راحت لامها ابوها اخوانها خواتها بس للاسف محد سمع لها قالوا مالج غير ولد عمج يعني ياولد عمج يالقبر
<<<< ترا مابالغ كل كلمه اقولها فعلااا صارت
المهم تمت الخطبه والملجه واتفقوا الزواج بعد ماتتخرج البنت من الثانويه
ووكان زوج نوره ( فهيد) يكلمها يوميا وبين حبه اللي كان كاتمه بقلبه طول هالسنين وبين لها شكثر هو متعلق فيها ولو ماخذها شنو ممكن يصير فيه وكان فعلا يعشقها يبوس التراب اللي تمشي عليه كان مدللها قبل لاتطلب يقول تم حاط لها الشمس بيد والقمر بيد
اما نورره بعد ماشافت كل هالحب منه تعلقت فيه وندمت انها ماواافقت على طول وانها بجت ورفضته ندمت انها قالت كلمه مابيه كانت ماتشوف غير فهيد عشقته تعلمت الحب من عيونه تعلمت الشعر عشانه كتبت فيه قصاايد كل قصيده احلى من الثانيه
الكل يشوفهم مثل روميو وجولييت او مثل قيس وليلى حبهم كان شريف وبرئ
لما وصلت نوره اخر سنه لها كانت بس تبي تخلص الثانويه عشان تتزوج حبيبها بس للاسف صارت مشكله بين هالعايلتين اللي فرقت بينهم
اخو نوره طلق زوجته اللي هي اخت فهيد
ومن القهر خوات فهيد وامه اصروا على اخوهم يطلق نوره وهم مالهم ذنب وللاسف العاشق الولهان
طلع ماعنده شخصيه قدامه امه وخواته بسهوله نسى كل شي وطلق حبيبته وزوجته عشان شنووو مايزعل اهله
وبعد ماطلقوه ر احوا بسرعه خطبوه له وحده ثانيه وحددوا العرس عشان مايرد لزوجته
لما استوعب انه مايقدر يعيش من غيرها كان يدق عليها يبجي ويترجاها ترجع داق عليها قبل العرس بايام يقول رديلي
نوره بعد ماطلقها عاشت بحالة صدمه يوم ماكانت تبيه غصبوه تتزوجه ويوم حبته وتعلقت فيه اخذوه بالغصب منها بس مادري شلون جتها قوة تحمل عشان ماتضايق امها المريضه مانزلت دمعه قدام امها كانت تسكت وتقول مافي نصيب وخيره ان شاءالله بس اول ماتدخل غرفتها تنهار وتبجي وتتعب
هي تحبه وهو يحبها لما كان يدق عليها كانوا اثنينهم يبجوون ومابيدهم شي بس لازم تمالك اعصابها وماتنهار وماحبت تشمت العذال فيها اللي من تطلقت مافي كلمه وماقالوا عنهاا
فهيد ترجا نوره انها تحضر العرس وفعلا راحت الصالون وقصت شعرها وصبغته وحطت مكياج اللي يقول هي العروس بس فرحتها ماتمت بنات عمها خوات فهيد كانوا موجودين بنفس الصالووون
ويوها قدام كل اللي بالصالون وتهاوشوا معاها وقالووا لها اذا ييتي العرس انتي والا احد من اهلج ياويلكم ندري تبون تخربون العرس والله اذا شفناج راح نطردج ومافي كلمه ************* موحلوه ماقالوها بس هي سوت نفسها ماهتمت طالعت فيهم وابتسمت وقالت حدكم ثقه بنحضر عرسكم انا معزومه على عرس بفندق********
عرس ********* وانا مافكرت ايي عرسكم ومشت وخلتهم مقهورين منها بس
<<<<<<<< ونوره كانت جميله جميله بمعنى الكلمه ماشاءالله
بس اول ماطلعت من الصالون وركبت سيارتها انهارت تعبت ردت البيت وهي منهاره ماكانت تبي امها تشوفها بس ماقدرت طاحت بحضن امها وبجت هذا ابوها واخوانها واقفين شسواا لها ماقدروا يسوون شي والعادات والتقاليد وينها اللي تخلي ولد العم يطلق بنت عمه بعد هالسنين ويخلي الناس تتكلم عنهااا
تخيلواا معرسنا فقدها ووماطول اخذ زوجته وطلع واول ماوصل شقته دق على حبيبته يسالها ليش ماحضرت ليش تفرح العذال
بس قالت له وهي قلبها مجروح ::
( انت اللحين واحد متزوج واحنا انتهينا انت بتظل ولد عمي وبحسبة اخوي وانا بمشي بطريج انت حطيته بدايته ونهايته وانا احبك وعمري ماخالفت لك كلمه ولازم انفذ كلامك)
قالهاانا احبج وماقدر اعيش من غيرج
قالت وانا بعد احبك واموت من غيرك وعهدن علي مايدخل قلبي شخص غيرك
سكرت التلفوون وتعبت نووره
كان فهيد دايم يدق عليها ويدز لها مسجات بس ماترد عليها مرت عشر سنين صار عنده عيال وقلبه متعلق مع نوره غسل ايده ترجع لها
نوره ماتزوجت لليوم هذا وكل ماياها ريال قالت لاخوانها قلبي لغير فهيد ماينبض انا ماراح اتزوج لافهيد ولا غيره
عاشت مع امها المريضه
وقبل خمس سنوات توفت امها اما ابوها متزوج كان مطلق امها من كان عمرها 13 سنه،
عاشت مع اخوها في بيت امها بس اخوها عايش حياته مع مرته وعياله وتعالوا شوفوا حالتها اللي يشوفها يعطيها اكبر من عمرهاا صارت ضعيفه حالها يصعب على الكافر
شوفوا العادات وين وصلت نوره ابوها واخوانها اللي زوجوها عايشين حياتهم مرتاحين وهي عايشه بجسد من غير رووح
تدرون شنو اللي يقهر اخوها رد زوجته اللي هي اخت فهيد واللي يقهر اكثر ساكنه معاها بنفس البيت ونوره هي اللي تدير بالها على عيال اخوهااا
كان بودي انشرلكم قصيده من قصايدها بس انا عارفتها مستحيل ترضى
ادعوا الله يوفقها ويعوضهاا بواحد احسن منه
وحسبي الله على الظالم
اتمنى الناس تغير نظرتها من هالناحيه ومايكون زواج بالاكراه ولايدخلون الاهل بمشاكلهم

ان شاء الله تعجبكم

هاي الحركة منتشرة وايد مع الاسف وخاصة في السعودية
والعائلات المحافظة جدا جدا
اقصد مو بالدين اقصد المحافظة بالعرف والعادات
وشكرا

شكرا اختي بنت المدينة